Bistro La Bon (已結業)

嗰日去咗觀塘接朋友收工，於是就搵吓附近會唔會有乜嘢嘢食，見到呢一間原本係另一個地方嘅鋪頭，原來搬咗過嚟新鋪位，於是就上嚟試吓。一入到門口就可以見到一排好靚嘅酒櫃，放滿晒紅酒好療愈。我哋叫咗牛油果虎蝦沙律，白酒煮蜆，煙肉洋蔥意大利粉，法國無骨燒春雞。呢一個牛油果虎蝦沙律份量啱啱好，唔會太少，又唔會太多。而且我特別鍾意佢嗰兩隻虎蝦，大大隻，又煎得好香口，好脆，加埋啲甜沙律醬真係好醒神同開胃呀。至於呢一個白酒煮蜆，唔會有好多隻合埋左口嘅蜆。終於嚟到主菜，煙肉洋蔥意大利粉，唔好睇佢好似好簡單，其實用嚟配酒就好夾啦。原因係佢煙肉味道比較重，配埋我嗌嘅嗰一杯mango rita，一啖重味道嘅意粉再加埋一啖酒，啱啱好可以喺口腔入邊中和左。呢個時候就上埋另一款我哋好期待嘅嘢食，就係法國冇骨燒春雞。一切開啲肉汁就已經流晒出嚟，而且出乎意料之外雞肉好嫩，唔會太熟，諧烚烚，連我嗰個唔係好鍾意食肉嘅朋友都大贊佢舊燒春雞夠晒嫩。最後我哋仲食埋一個精緻嘅Blueberry cheese cake，好滿足。順便一提呢度嘅服務好好，我哋食完一道菜，之後都有過嚟幫我地換碟同刀叉，我真係以為自己係高級餐廳食飯啊。