我一個人食飯就鍾意簡單啲嘅,快快手食飽就係一餐!去西餐廳就適合一個人食,反而去酒樓就怪啲!而今次去嘅尼斯堅尼地城店係我平時係堅尼地城一帶間中會幫襯嘅!係我印象中佢嘅食物,環境,服務,衛生各方面質素都算唔錯,價錢唔算太貴!相比嚟講我對佢較為有信心,不過間中都會失手!始終我嘅要求唔高,若果唔係錯得太過份,都會原諒佢嘅!:)
味道方面,今次1個人叫咗個茶餐,味道只屬一般!食物包括:
(1)豬骨湯底配即食麵:薄切牛扒用咗黑椒調味,帶點辣香!可惜有啲酸味同雪味,將近變壞,用料唔新鮮!肉質較鞋較乾身,好似白烚咁!同埋太多筋同肥膏,冇篩選好就上碟!好在分量唔少,仲加咗喲配菜!即食麵唔怕腍咗,分量適中!湯底味道討好,鹹度適中!凍咖啡味道適中,唔會淡而無味!
環境方面,尼斯堅尼地城店係去年底裝修過,地方都尚算新淨!佢嘅裝修唔係而家部分西餐廳好豪華高貴或者新潮搞鬼嘅風格,而係較為簡潔清雅嘅裝修,唔會有好多特別嘅燈飾!佢冇設置電視機,先進與否就見仁見智!呢個舖位唔係幾大,仲要係位處於比較舊嘅樓宇中,少不免有柱多,橫樑多及樓底矮等等嘅問題,視野唔算廣闊!另外檯凳部分放得較擠迫,部分就放得寬敞!整體總算坐得自在,始終唔應該要求咁高!
服務方面,大部分服務員工作效率同態度都中規中矩!不過無乜禮貌!若果各個服務員有多啲笑容就更好!
衛生方面,碗碟唔算乾淨,地方就幾企理!
抵食方面,星期五下午茶時段不設加一,大部分茶餐嘅價錢都唔算太貴,價錢可以接受!:)
整體嚟講,大部分茶餐價錢唔算太貴!至於食物,環境,服務,衛生各方面質素只屬一般,係我嘅要求嚟講都係合格嘅!當然各方面質素未係盡善盡美,仍然有改善嘅空間!食飽之後,我就番屋企訓覺!:)
