我食飯就鍾意熱鬧嘅,大家應該有講有笑!去酒樓就可以慢慢食慢慢傾,唔似得去快餐店咁各自為政!而今次去嘅稻香信和廣場店係我地平時係灣仔至銅鑼灣一帶間中會幫襯嘅!係我地印象中佢嘅食物,環境,服務,衛生各方面質素都算唔錯,價錢唔算太貴!相比嚟講我地對佢較為有信心,不過間中都會失手!始終我地嘅要求唔高,若果唔係錯得太過份,都會原諒佢嘅!:)
味道方面,今次4個人叫咗幾款點心同埋湯粉麵,結合屋企人同埋自己嘅評價,味道皆算唔錯!食物包括:
(1)貴妃雞米線:貴妃雞欠缺鮮味,肉質較鞋!米線有質感亦夠軟身,分量恰當!湯味可以接受,鹹淡適中!
(2)豉汁蒸排骨:排骨新鮮入味,離骨易食!豉汁味道突出,令排骨更加惹味!
(3)蠔皇鮮竹卷:餡料包含蝦粒,豬肉同蔬菜粒,味道豐富!蠔汁鮮甜,味道突出!
(4)香茜牛肉腸:牛肉分佈平均,味道就較為清淡!腸粉皮偏厚,未見晶瑩剔透!:)
(5)豉汁蒸鳳爪:鳳爪皮肉厚,唔怕太削!豉汁味道突出,令鳳爪更加入味!
(6)香麻叉燒酥:叉燒蜜味突出,肥瘦適中!酥皮有少少腍,唔夠香口!可惜太細件,明顯將貨就價!:(
(7)日式煎餃子:餡料入味,肉汁鮮甜!餃子皮厚薄適中,煎得香口!
(8)潮州蒸粉果:餡料包含菜粒,粉葛同花生粒,味道幾濃!粉果皮稍厚,令口感變差!:)
(9)竹笙碗仔翅:有肉絲同粉絲等材料,味道討好!湯底較傑,似乎打咗唔少漿粉!
(10)馬拉卷併糯米卷:馬拉卷帶點蛋香,仲幾鬆軟!糯米卷味道香濃,餡料不乏花生粒,包面亦幾鬆軟!
(11)薑汁雞包仔:餡料肉粒,菇粒同蔥花味道香濃,薑味反而唔算突出!餡料分量恰好,包面同樣鬆軟!
(12)蘿蔔牛筋腩:牛筋腩入味,味道討好!可惜又大件又未夠腍,比較難咬!
(13)銀絲滑雞卷:餡料包含雞絲,菜絲同紅蘿蔔絲,味道清淡!點上豉油,鹹度反而啱啱好!:)
環境方面,稻香信和廣場店開業應該有幾年時間,地方都唔算新淨!佢嘅裝修唔係而家部分酒樓好豪華高貴嘅風格,而係較為新潮搞鬼嘅裝修,天花佈滿大小不一嘅圈圈!佢設有顧客輪座電腦管理系統(列印輪候票,螢幕顯示輪座狀況及自動發聲叫號),自動感應水龍頭,自動感應梘液機等先進設備,先進與否就見仁見智!另外佢電視機唔算多唔算大,亦冇開比人睇!呢個舖位唔係幾大,但好在唔係位處於比較舊嘅樓宇中,避免咗柱多,橫樑多及樓底矮等等嘅問題,視野都幾廣闊!另外檯凳部分放得較擠迫,部分就放得寬敞!整體總算坐得自在,始終唔應該要求咁高!:)
服務方面,大部分服務員工作效率同態度都中規中矩啦!不過開茶就耐喲!若果各個服務員有多啲笑容就更好!:)
衛生方面,碗碟尚算乾淨,地方都幾企理,洗手間亦幾乾爽!:)
抵食方面,星期六下午茶時段茶位$6,大部分點心嘅價錢都唔算太貴,價錢可以接受!:)
整體嚟講,大部分點心價錢唔算太貴!至於食物,環境,服務,衛生各方面質素都算唔錯,係我地嘅要求嚟講係合格嘅!當然各方面質素未係盡善盡美,仍然有改善嘅空間!食飽之後,我就例牌行吓時代廣場同皇室堡!:)
