味道方面,今次3個人叫咗幾款點心, 1碗燒鵝檬粉同埋1碗貴妃雞檬粉,味道皆唔錯!食物包括:
(1)燒鵝檬粉:燒鵝肉夠厚,皮夠香口!檬粉口感唔錯,分量足夠!湯味未見突出,可更濃味!
(2)貴妃雞檬粉:貴妃雞難得有鮮味,但係骨多肉少!檬粉口感唔錯,分量足夠!湯味未見突出,可更濃味!
(3)四寶滑雞扎:材料配搭雖則唔係最正宗,但係食落都算幾夾!
(4)南瓜蒸排骨:排骨新鮮入味,離骨易食!醬汁嘅南瓜味就唔算突出!
(5)蠔皇鮮竹卷:餡料及水分足夠,蝦粒同埋蔬菜新鮮!鮮竹皮幾嫩,蠔油醬汁味道鮮甜!
(6)香芋鴨腳扎:鴨腳幾入味，可惜唔夠淋!至於腐竹皮都幾夠嫩!
(7)金牌流沙包:流沙餡呈固體狀態,未夠流質!餡料只有奶皇味就冇蛋黃味,味道唔夠香濃,同奶皇包冇分別!包面亦唔鬆軟!
(8)鮮竹牛肉球:牛肉球味道討好,仲有少少馬蹄,令溝咗唔夠麵粉嘅牛肉球增添口感!:)
(9)香煎蘿蔔糕:蘿蔔糕嘅蘿蔔絲好足!不過切得太厚,加上冇乜點煎過,所以一D都唔香口!:)
(10)招牌無敵叉燒包:叉燒餡料肥瘦適中,仲要係特大版!如果醬汁多D會仲好,而家乾咗少少!
環境方面,德馨苑石塘咀店開業咗幾年,地方唔算殘舊,佢嘅裝修設計唔係而家普遍酒樓走嘅豪華或高雅路線,亦唔係較為富時代感同新潮,而係好普通嘅格局,冇乜特別設計!佢設有電腦座位分配系統(電腦票,電視屏幕顯示叫號及電腦聲音叫號),但係冇自動感應水龍頭,自動感應梘液機等先進設備,先進與否就見仁見智,至於電視機多但係細!呢個舖雖然係幾大,不過分咗兩層,視野唔夠廣闊,仲係身處於比較舊嘅樓宇中,有柱多,橫樑多及樓底矮等等嘅問題,不過都算坐得幾自在!:)
服務方面,中規中矩啦,大部分服務員做野都有效率,係粗手粗腳咗少少!如果各個服務員有多D笑容就好啦!:)
衛生方面,碗碟尚算乾淨,地方企理,洗手間尚算乾爽!:)
抵食方面,星期四下午茶時段茶位$6,大部分點心嘅價錢都大眾化,算幾抵食!:)
整體來講,大部分點心價錢化算又多選擇!至於食物,環境,服務,衛生各方面質素都唔錯,係我嘅要求嚟講係合格嘅!:)
