味道方面,今次12個人叫咗龍蝦燕窩全包宴,味道皆唔錯!食物包括:
(1)上湯焗加拿大龍蝦:龍蝦尚算新鮮,上湯味道溶入倒落龍蝦肉中!分量以呢個價來講就算係咁!
(2)鴻運乳豬全體:乳豬皮幾脆,不過肉就太肥囉!
(3)沙律百花釀蟹拑:蟹拑嘅肉幾彈牙,但係冇乜鮮味!蟹拑外皮都夠脆!
(4)XO醬翡翠富貴蚌:蚌片都幾夠淋!不過唔係幾食倒XO醬嘅香味,淨係有少少辣辣地!
(5)松露雞茸燴燕窩:同其他酒樓一樣唔係好覺有所謂嘅松露同燕窩,只係冇翅環保而攞分!
(6)清蒸大海花斑:條魚蒸嘅時間控制得唔錯,魚肉離骨得來又幾滑!
(7)紅燒肘子砂窩津膽:呢款菜式全包宴好少有,又係個新嘗試!
(8)當紅脆皮炸子雞:皮又香又脆,雞肉又滑,簡直係皮脆肉嫩!
(9)瑤柱蛋白炒飯:瑤柱唔見影,但係都幾有鑊氣!
(10)滋潤甜品:紅豆沙味道夠甜!紅豆粒分量適中!
(11)環球生果盤:生果唔係幾甜,不過亦係市面上生果嘅趨勢!
環境方面,喜悅中環店裝修咗年幾,地方有少少殘舊,佢嘅裝修設計唔係而家普遍酒樓走嘅豪華或高雅路線,反而係較為富時代感同新潮!佢都幾先進架,有引入電腦座位分配系統(電腦票,電視屏幕顯示叫號及電腦聲音叫號),自動感應水龍頭,自動感應梘液機等先進設備,又設置多部電視機!呢個舖雖然係幾大,不過分咗3層,視野唔夠廣闊,仲係身處於比較舊嘅樓宇中,有柱多,橫樑多及樓底矮等等嘅問題,坐得唔係幾自在!:)
服務方面,中規中矩啦,大部分服務員做野都有效率,仲同我地推介火鍋優惠!如果各個服務員有多D適當嘅笑容就好啦!:)
衛生方面,碗碟比較污糟,地方擠迫,洗手間地下幾濕!:)
抵食方面,星期五晚幫襯$1888包11款菜式,鮮橙汁2渣,12位茶芥及加一服務費,算係咁!:)
整體來講,呢個龍蝦燕窩全包宴價錢化算!至於食物,環境,服務,衛生各方面質素都唔錯,值得嚟幫襯!:)
