大和日式料理 (已結業)

星期三，與太座一起到銅鑼灣做面部護理。事後，太座話突然間好想食日本嘢，但係又唔想食得貴。要滿足此要求，只有求助港式日本料理。幸好，身處銅鑼灣，要搵一間港式日本料理話都冇咁容易。今次被挑選嘅餐廳係位於金百利廣場嘅「大和」，基本晚市套餐大約六十蚊左右，包括自助麵豉湯及沙津。當然，任食嘅嘢都唔需要期望有什麼樣嘅質素。太座與筆者各自揀了心頭好：和風牛肉飯($42) – 係筆者嘅選擇，飯粒豐滿而短小，入口有嚼勁，相信用咗日本珍珠米，話明和風，用日本米，起碼夠誠意。用上了肥牛肉，味道也錯不了去邊度，水準近似以賣牛肉飯出名嘅吉野家，以燒汁、芝麻等調味，效果唔錯。不過，燒汁份量實在太多，可以用氾濫來形容，令旁邊嘅白飯底都索滿了燒汁，令白飯太鹹/甜，十分影響味道；三色魚生飯($58) – 係太座之選，魚生有三文魚、帶子及海胆，飯都係用咗日本米。魚生嘅質素當然冇名店咁高，不過都係新鮮貨色，除了海胆有一絲苦澀味，拉低整體水準。再加五蚊可以換玫瑰花蜜。以平均消費五十八蚊一位計，响日本菜嘅範疇嚟講都算係便宜一族了。