祥香茶餐廳 (已結業)

星期一，天氣開始有點翳熱，幸好下午落咗一場雨，驅驅早來嘅暑氣。與太座往西環中醫求診之後，時間差不多五時，還來得及食一個輕便的下午茶。於是我們一直往西走，去祥香歎一歎下午茶。未到門口，已隱約傳來陣陣蛋撻香味，筆者與太座互相交換一個眼色，往閣樓就座之後，先嚟兩個新鮮蛋撻。到舊色茶餐廳，飲奶茶是少不免的了，再加一份蛋治烘底。祥香嘅蛋撻係以牛油餅做皮，與牛油酥皮各有所長。牛油餅皮烘得十分香，牛油香氣四射，入口亦鬆脆。中間嘅蛋心熱辣辣，蛋味亦濃郁，蛋漿與糖嘅比例剛好，甜味恰如其分，入口香滑，十分出色，所以食完都要打包拎走。奶茶亦相當有水準，紅茶香與奶香配合得宜，而且沖得十分滑，飲完都唔會於口腔中殘留鞋口感。蛋治合格，蛋炒得香滑，奈何炒蛋份量太少，有麵包多過炒蛋嘅感覺，難令人因炒蛋份量而產生滿足嘅感覺。奶茶一杯十蚊，蛋撻一件三蚊，蛋治九蚊烘底多一蚊，實屬經濟抵食之選。