抹茶館 (荷里活廣場) (已結業)

今日想同大家分享嘅唔係抹茶館食嘅主菜，而係佢嘅免費甜品！早前我做咗荷里活廣場嘅會員，可以喺商場唔少鋪頭享用優惠，抹茶館係其中之一間。只要係加一之前食滿$200，就可以免費享用甜品一客，我嗰日就係送抹茶軟心朱古力芭菲，平時單叫要$59。我同屋企人叫咗卡邦里烏冬，照燒鯖魚飯同味增炒茄子蕃茄，就可以送甜品送嘅甜品同平時單叫嘅份量一模一樣咁驚人，抹茶雪糕有回甘味，配上朱古力醬啱啱好。第二層嘅抹茶軟心朱古力同紅豆蓉比較甜，要同粟米片一齊食先可以冇咁膩。忌廉嘅份量對於我來講就多咗少少，我食唔晒啲忌廉。最開心嘅係中間嗰層仲有抹茶軟雪糕！食完真係好有罪惡感，不過好滿足！