2+2 Café (已結業)

上星期日11月9日突然想食自助餐、即日訂到2人枱、晚上6點半去到2+2 cafe，當時被安排近門口似是臨時坐位、張枱超細、枱與枱之間好迫、後來要求調往旁邊其中一張正常吉枱。食物質素比上年差好多。人參雞湯、冇人參味、雞味都冇乜、似飲淸水少少。沙律唔新鮮，無乜沙律菜選擇，連沙律汁都無咩味，最奇怪是d 羅馬生菜是一棵切開4邊左右、但冇切菜頭成條上的、問侍応點解、佢答話而家興喎。今次自助餐有小打邊爐湯底另上、每人有半隻焗芝士小龍蝦。湯底無味、打邊爐d 料完全唔掂、唯有食菜、隻半邊龍蝦、頭大肉少、上面的焗芝士又咸到死。甜品方面，冇乜選擇、賣相唔吸引、味道一般！而雪糕之前有3款Pappagallo + 3款Haagen Dazs、而家只有 3款Haagen Dazs+ 3款普通雪糕, 縮左水,冇左Pappagallo !生果又冇乜選擇，得火龍果、西瓜同菠蘿。食得好不滿足、返到屋企，想煑面食添！服務又麻麻、冇人收碟..，期間，見到好多食客投訴。總結，今次完全失望！食物除生蠔之外，無乜可取！比起去年、質素差得遠矣。價錢同食品不成正比。