翡翠拉麵小籠包 (已結業)

使用某信用卡可以以328元，享用二人餐。未計加一。鎮江排骨，小籠包 ，酸菜魚，糖醋雞球， 上海炒粗麵，加兩杯豆漿。 因為已經有嘢飲，所以我叫佢唔好開茶。埋單係 $360賣單。小籠包係我去翡翠嘅主要原因，小籠包一直都冇令我失望，裏面好多汁而且皮薄。 每粒都好易夾起唔會破皮。鎮江排骨， 多骨，少肉，當頭盤咁食ok啦，份量都唔算多 。糖醋雞球 只有七舊，啲汁好傑，好似蜜糖咁，有啲太甜。呢個酸菜魚嘅肉質好奇怪，我唔知佢點整，魚片好似魚蛋好彈牙，好奇怪， 感覺上係佢唔知點樣醃製一啲唔太新鮮嘅魚。 魚片份量都算多， 冇骨。酸菜魚湯唔錯，配上少量嘅寬條麵，如果多啲寬條麵會好的。 上海炒粗麵叫咗佢少油，正常啦， 我怕食到成口油。個豆漿都幾甜。總體嚟計，呢個套餐好似好抵，但其實每樣份量都比較少 。 兩個人食，食得飽。算係可以以平嘅價錢，食到唔同嘅餸菜。