請坐 (已搬遷) 新店位置

西環愈來愈多小店，要有特式同賣點先可以突圍而出。請坐主打台灣地道食品。一入去已經有職員用台灣腔嘅普通話同我哋打招呼，瞬間好似去咗台北咁。下午茶時段食物選擇都多，而且價錢喺西環嚟講算係平。分別叫咗三款食品: 小滷肉飯，肉鬆蛋捲，烤火腿起司吐司，同兩杯珍珠奶茶。可能係開張不久，職員又未係好熟手，要等一陣先有人埋嚟落單，又有職員落漏單。不過佢都好有禮貌道歉，算係可以接受。等食物上枱都有一段時間，珍珠奶茶先上，味道唔會太甜，茶同奶比例剛好。滷肉飯睇落細細碗，其實d飯都多，酸菜配半肥瘦豬肉，肉汁夠多，送飯一流。不過我食慣濃味，所以覺得個汁可以再咸翻少少。肉鬆蛋捲，金黃色加上少少烘燶嘅效果，賣相好靚。食落去 有好香嘅蛋味，肉鬆餡料充足。最後個烤火腿起司吐司等得比較耐，差不多食完其他嘢先上枱。上枱見到佢吐司多到就快滿瀉，食落熱辣辣，又香又脆，又好味，怒火即時降溫。整體而言，食物可以，相信職員熟手後服務會更好。