大嫂甜品 (已結業)

上個月尾第一次去呢間”大嫂甜品", 係住喺西營盤o既朋友帶我去, 佢話呢度o既朱古力燉蛋(凍)好好味, 就去試吓. 去到大約下午3點鐘, 朱古力燉蛋已經賣晒, 要等到夜晚先有, 我哋就叫咗合桃露配燉蛋(@$22). 佢係半碗凍o既燉蛋上面加上半碗熱o既合桃露, 好香濃, 好滑, 而且少甜, 面頭仲有d脆卜卜, 烘烤過o既合桃碎, 好耐都冇食過令我咁滿意o既糖水啦! 比起”大良八記”同”滿記”, 呢度o既合桃露實在係太出眾啦!我哋仲叫咗煎蘿蔔糕($8)同卥水豬頸肉($15), 但前者造得太粉, 後者好多肥膏, 質地好軟似肥叉燒, 唔係咁好味...到咗3月11號, 我帶咗另一個朋友去, 都係食咗合桃露, 再加多碗杏仁露. 合桃露依然係咁正, 我朋友都欣賞; 而杏仁露o既味道就同其他舖頭差唔多不過比較杰身, 唔會水汪汪, 都算好味.到而家兩個禮拜冇去, 我好想快D又去食令人回味o既合桃露, 同埋要試吓朱古力燉蛋. 可惜o既係地點唔就腳, 如果搭電車去可以喺”創業廣場”落咗車行一陣, 如果搭巴士, 5號同10號就差唔多可以去到甜品店o既門口落車.