樂園 (已搬遷) 新店位置

今日母親節我就約咗媽媽，去尖沙咀食飯，好彩我媽媽今日早左放工，我哋可以好早到餐廳叫食物，可能好多人都好似我咁預早慶祝母親節，唔夠七點，成間餐廳都爆曬。我叫左一個母親節廚版，我阿媽勁開心，佢覺得我好有心思帶佢嚟呢一間餐廳，我媽全餐飯都幾開心，對間餐廳讚不絕口，所以為咗要同大家分享啲好嘢，我就選擇咗上嚟寫食評！好評！成個母親節廚版好大塊，佢嘅面積大約係好似一張中學學生寫字枱咁樣，初初對依個廚版就冇乜大期望，以為得好少嘢食，但點知出到嚟嘅效果係非常之好，好多嘢食，食到我哋都飽晒，我媽媽仲話比餐牌上嗰張圖仲要豐富，搞到佢覺得好抵！哈哈。。。有鵝肝多士，有兩隻大元貝，有安格斯牛柳粒，有螺肉，簡直數之不盡。。。廚師好有心機因為知道母親節，佢就整咗好多嘅牌仔做裝飾之餘，仲特登整咗兩粒士多啤梨做小花，呢個係我非常之欣賞嘅，因為我覺得好靚。母親節真係離不開花，廚師整咗一個白色小花樽裝住一d假花，白色小花樽係由飯整成嘅，非常有創意，令我覺得佢哋真係好有心機整，好中意，好有心！