老厝邊 (已結業)

今日去奧海城行街，唔想喺商場食連鎖舖頭，所以去咗附近大角咀老街搵食，呢間舖頭名幾有得食，’厝‘廣東音粗，價錢又唔貴，門口的侍應又講普通話，感覺正宗。個古早味滷排骨飯一放低，即刻俾佢吸引住，再用手度一度，應該有10吋長，拍得住豪xx雞排，炸得鬆脆，肉質淋得嚟但仍有咬口，味道濃淡適宜，配合埋個飯，份量足夠兩個女仔食。眷村紅燒三寶麵，牛腱厚身尺寸大，好淋有牛味，牛筋啫喱感十足，覺得有好多骨膠原，份量亦算多，牛筋及牛肚都有4-5件。大腸麵線亦十分正宗，大腸肥而不膩。花雕醉雞做法同上海完全唔同，好似用雞髀肉捲起後再浸花雕酒，醉雞肉切出嚟圓圓轆轆，醃製入味。芋泥蛋餅喺呢度招牌菜，睇佢牆上面的牌介紹，原來加咗牛奶，入邊除咗芋泥再加埋肉鬆，一定要點佢哋特別調製嘅醬料，只有好輕微嘅辣，即刻提升味覺三成以上。台式飲品反而唔算突出，合格之選。