Mega-1 (已結業)

星期六, 同家人去左屯門一間頗新o既西餐廳mega-1, 裡面有酒吧, 有桌球枱, 有電視播住V台, 可以邊睇住韓國歌曲MV, 邊嘆食物。請到食物方面, 我同家人各點左一樣主菜, 叫左一杯飲品, 首先介紹o既係檸檬梳打,本來想叫可樂 ($23) , 問職員有冇得無限添飲, 佢話冇, 之後介紹呢款梳打 ($38), 話依家做緊買一送一, ,可以分別揀唔同o既味, 可能口渴o既關係, 覺得得特別好飲, 味道不太甜不太酸, 味道適中。之後到主菜啦, 我叫左個龍蝦計意粉 ($98) , 價錢有少少貴, 不過食落就覺得值回票價, 個龍蝦計唔太濃, 而且夠多汁, 啖啖食落好似飲緊龍蝦湯咁, 裡面重有魷魚, 蘑菇, 同埋小蝦肉, 份量夠, 分左少少俾家人都夠食。最後介紹o既係家人點o既鵝肝漢堡 ($148), 價錢都係有少少貴, 不過勝在服務唔差, 有職員幫我地切開四份, 有四支籤穿住, 好似食串燒咁, 唔怕整污糟之餘, 又係一個新鮮o既食法。唯一不足o既係, 鵝肝佔o既分量比較少。總括黎講呢間餐廳係不過不失, 值得再翻兜。