烘焙工坊 (已結業)

阿頭知道小弟鍾意食奶黃月餅，每年都會張其中一盒嘉麟樓塞俾我拎返屋企同家人分享。但係龍肉食得多都會無味，加上近年水準下跌，所以每年自己都會另外買多盒奶黃月餅孝敬父母。一向無要求嘅老媽子忽然指定要試今年人氣大熱 - 鼎爺，唯有搵住係北角嘅同事救救住係新界嘅我。三日後收到兩大盒鼎爺月餅，精美禮盒包裝，一盒八個，每個都有獨立包裝。實在忍唔住，即晚已經開出黎試何謂古法奶黃月餅。打開包裝拎上手外皮柔軟唔痴手，最重要無空中解體，安全降落。月餅外層烘焙兩字清晰可見，睇落油潤軟熟，而非鬆脆曲奇式外層，亦無廣告相上嘅燶皮乾惑。切開睇睇，外皮薄身，餡料尚算飽滿，但左右有少少離殼。奶黃餡有色澤有油份，但食落口感幼滑無肥膩感，奶黃味香。鼎爺出品果然有一定水準，二百二十八蚊一盒價錢合理，希望有日可以一嘗老人家嘅另一古法。