
店舖內嘅牆壁上已經見到佢嘅招牌菜式,原來呢度唔止有燒味飯,仲有炒飯、炒河同小菜,最緊要就係「白飯任裝」。

睇餐牌先知,原來叉燒係來自豬嘅唔同部位,肥叉就係腩肉,瘦叉就係梅頭肉。


一場嚟到,當然要試黯然銷魂飯,叉燒份量相當多,再配埋一隻煎得好靚嘅太陽蛋,連埋一條灼菜,店員仲話黑色嗰兜就係師傅秘製嘅叉燒汁,要來點叉燒又得,要來撈飯食又得。唔好睇佢咁深色,其實一啲都唔鹹,而且佢裏面仲有爆香咗嘅乾蔥,所以非常香口,我相信當日令到家燕媽媽七情上面嘅就係呢個叉燒汁!

因為好想試埋其他燒味,所以另外點咗個燒味雙拼,揀咗燒鵝髀拼切雞,燒鵝皮脆肉滑,白切雞肉質鮮嫩。

因為我哋兩個人食,只係一個飯實在唔夠飽,所以仲叫咗個乾炒牛河,呢個乾炒牛河上面仲加咗木魚絲,睇見都知熱辣辣,好有動感。乾炒牛河有好多牛肉,而且做到少鹽嘅效果,好健康!

我哋每人叫咗一杯檸蜜,一凍一熱,原來凍飲大杯咁多。

特別要讚一讚呢度嘅服務,首先店員好有禮貌,而且仲會主動提供碗仔,同埋一個放骨專用嘅紙兜,真係非常細心。
