聚來車仔麵

营业中

休息中

深水埗有几间车仔面都好出名，呢间聚来车仔面亦渐渐为人认识，而佢最出名嘅并唔系车仔面。虽然重点推介嘅唔系车仔面，但都要点返碗医肚兼过吓口瘾。难得佢嘅蕃薯粉唔使加钱，当然系叫蕃薯粉($10)做面底，配料就拣咗上汤花胶($13)、鱼片头($10)、墨鱼丸($9)同红肠($9)。车仔面属正常水平，上汤花胶清得嚟够入味，我就几钟意。蒜泥白肉分量超多，而且铺满蒜粒，非常香口惹味。其实呢度必食嘅系佢哋嘅招牌鲜煎饺子，饺子属自家制，分别有韭菜饺、椰菜饺同芝士粟米饺，而且可以双拼。椰菜饺入面除咗有椰菜同猪肉，仲有木耳丝，椰菜配猪肉味道鲜甜，而且煎得香脆，非常美味。芝士粟米饺就最啱小朋友食，浓浓嘅芝士再配上煎得香脆嘅饺子皮，感觉有点似食紧pizza。而另一个最值得慕名而来嘅，就系佢嘅爆浆阿华田西多士。西多士本身可以选择榛子酱或花生酱，个人认为榛子酱配阿华田味道更夹。西多士中间挖空，洒上阿华田粉至完全覆盖整件西多士，然后再注入佢哋特别调配嘅酱汁，大概系云呢拿炼奶嘅味道，切开就有如岩浆流出，每口多士都沾有酱汁，真系好味到要舔碟。