十二味 (山市樓) (已結業)

雖然呢幾年川菜館係香港越開越多，但自己一直都未食過香鍋，今次同班嗜辣嘅朋友仔飯聚就特登揀左呢間位於堅尼地城嘅十二味一嚐香鍋嘅滋味。餐廳裝修走中國風，佈置陳設精緻有心思。餐牌介紹香鍋係發源於重慶，仲話呢度嘅香鍋所用嘅香油係用左十二種香料炒製成，有二十幾種配料可以揀，我哋當然唔會錯過啦！先嚟一個經典香辣鍋配料我哋揀：午餐肉、滷水肥腸、美國肥牛、豬頸肉、萵筍、金針菇、鮮腐竹、豆皮、寬粉同娃娃菜。一上枱已經聞到好香嘅香料同麻辣味，賣相顏色鮮艶，食落鮮、麻、香、辣俱全👍再嚟點左呢度嘅另一招牌菜，人見人愛酸菜魚🐟，魚肉口感非常嫩滑，湯底、魚肉同酸菜，啖啖都鮮、甜、香、辣，難怪可以成為招牌菜之一。川式口水鷄，一上菜已經聞到麻辣香撲鼻，鷄肉夠嫩滑，配埋個汁一齊食，正！涼拌土豆絲，非常爽脆，麻辣味適中，口感同味道俱佳👍幺妹兒冰粉，清甜爽滑，既解辣又好食。欲望酸梅，杯入面有幾乎成隻咁大嘅檸檬，檸檬味加上梅味，飲落酸味有層次，既好飲又解渴總括嚟講呢餐食物、環境、服務都屬優質，價錢又十分實惠，真係唔錯！