香江花月 (利舞臺廣場)

营业中

休息中

之前见杂志介绍利舞台𠮶间主打火锅同精致点心嘅「香江花月」，一直想揾个机会嚟试下，咁啱今日要嚟铜锣湾换礼券，趁机过去食个午餐。餐厅陈设以 50 年代嘅旧香港为蓝本，甫出升降机，一幅幅经典电影油画海报随即映入眼帘。中庭位置放了一部古董电单车，再配以琉璃绿色幕帘，令人有恍如置身于舞台剧场般。另外餐厅设有七彩波波灯镜房，环境超梦幻，啱晒钟意周围去打卡影靓相嘅朋友仔！今次嗌咗一个炒饭同三款点心。姬松茸鲜竹卷：鲜竹卷真材实料，内有竹笋和茶树菇，菇菌清香怡人，腐竹透薄不韧，加上充满姬松茸菌香嘅热汤，滋润又美味。金粟金鱼饺：摆盘好有意景，金鱼饺白里透红，入面嘅虾肉大大只，爽弹味鲜，配上粟米清汤，睇落好似喺池塘畅游一样，令人赏心悦目。另外呢款红袍荔枝亦系必食之选，用上红色糯米皮做出外层，而内馅则以荔枝茸及奶黄混合制成，皮层脆中带烟韧，奶黄馅心微甜香软，色香味俱全。最后嚟一碟迷你鸳鸯炒饭，卖相好吸引，色彩鲜艳，绿色𠮶边系菠菜汁配鸡肉和菜心，而红色𠮶边就系红肉火龙果汁配虾仁同带子，食落口感好丰富，非常醒胃，有营又健康。整体来说，餐厅嘅布置非常用心，座位阔落舒服，店员亦招呼周到，绝对值得再访。