翠亨邨 (利舞臺廣場) (已結業)

老公鍾意食點心，仲要食得好多吓嗰隻，幾個月前見雜誌介紹翠亨邨有點心放題，心諗一定要帶佢嚟食。之前都有幫襯過正價午市飲茶，係好味，不過真係貴咗d囉…今日放假，11:00am打去訂即日，好彩有位。12:00pm去到即刻可以入座，放題$148免茶免加一，真係好抵，仲要我哋食得勁多，點心紙上除咗叉燒腸同牛肉腸無食，其他全部食哂，有d仲要番叫，哈哈…我最欣賞奶皇包，d奶皇好香好滑，包包軟熟，細細隻啱哂食放題原則，讚仲有佢哋d炸嘢都好味，新鮮熱辣脆卜卜，食得出並非萬年油。錦鹵雲吞個汁好正好正。提提各位，此放題並無預位食甜品嘅需要，我試哂咁多款甜品，無一樣合格另外，環境舒適唔迫，服務好好，無走單錯單情況，食物亦嚟得好快。