巴巴串 (已結業)

我喺觀塘買開韓國衫，最近喺boutique隔離開咗間巴巴串，店主話試過都幾繽紛幾抵食，今日上去攞完衫，就順便幫襯下。雖然係工廠大廈，又食串燒，佢呢度冷氣十足唔覺得焗，環境仲幾寬敞添。除咗串燒，仲有好多唔同款式嘅小食，海南雞飯、雞絲粉皮、拍青瓜、京燒茄子等等，各適其適，應有盡有。仲有冷盤海鮮，凍蝦都幾爽口。炸物就啱晒小朋友。熱盤就不乏蔬菜類，嗰晚仲見到熱盤不停換款，真係可以食唔停。凍櫃入面有好多唔同嘅串燒，肉類、丸類、蔬菜等，一串串整齊排列，夠晒方便。雪櫃裏面仲有唔同款式嘅甜品同飲品，店員仲會不停添加。雪糕選用本地知名品牌可可貝妮，以呢個價錢我覺得合格有餘。原來每位客人仲有半邊芝士焗龍蝦，真心有驚喜。除咗龍蝦，每位仲有鮑魚一隻，燒鮑魚再點汁真係一流！燒烤爐嘅設計非常方便，每串串燒放上燒烤爐之上就會自轉，另外仲可以攞燒烤網架，方便燒烤唔同嘅海鮮。呢度嘅食物果然夠哂繽紛，仲見到店員好努力咁清潔燒烤爐，真係食得開心又放心！