酒鍋 (V Point) (已結業)

今日約咗屋企人去銅鑼灣行街，諗起朋友介紹附近有一間打邊爐好正嘅地方，今晚一於同屋企人試吓。「酒鍋」位於銅鑼灣某商業中心高層，我哋一坐低就已經俾佢嘅環境吸引咗。再望出去原來可以睇到好靚嘅景色，令人心曠神怡。睇完餐牌之後我哋叫咗個「黃金美人」嘅湯底，湯底足料，有齊雞件，花膠同埋豬肚。非常適合女士食用。配菜方面我哋今晚揀咗安格斯牛小排、日本黑毛豬豚腩肉、手打蝦丸、墨魚丸、蜂巢豆腐、黑松露蝦蟹餃、鮮菜什菌拼盤同埋一試難忘嘅黃金炸魚皮。首先講安格斯牛小排，肉質鮮甜，油脂分布平均，肉味非常濃郁。跟住試吓黑毛豬豚腩肉，同牛小排一樣，肉味濃郁，最重要係肥瘦分明。至於手打蝦丸和墨魚丸，大大粒，而且爽口彈牙，口感非常好。我覺得佢嘅黑松露蝦蟹餃係必食嘅配菜，黑松露嘅鮮味再加上一粒粒彈牙嘅蝦肉同埋一絲絲嘅蟹肉，非常足料，而且口感十分滿足。佢哋嘅蜂巢豆腐我覺得都好好食，我哋一早將啲豆腐放入湯底裏面，吸晒湯裏面嘅精華，真係超好食。到最後不可不提嘅就係佢哋嘅黃金炸魚皮，咬落非常爽脆，每一塊魚皮都黏有鹹蛋，非常惹味。到最後飲番杯餐廳自製嘅雪梨茶同竹蔗茅根水，真係清熱解渴。最特別嘅係佢哋嘅電燈膽形狀嘅杯，非常特別。