正 麻辣·茶·雲吞 (已結業)

好耐冇食麻辣，但又唔想食大路野。今日咁啱經過依間麻辣茶雲吞，即便入去試一試！我地叫手撕雞擔擔麵、秘製麻辣撈麵、韮菜餅，雙拼雲吞同一杯海鹽青檸茶。手撕雞擔擔麵麵身爽口彈牙，湯底亦充滿麻香。中辣都唔算好辣，湯底非常香濃。雞肉嫩滑好食，整體配合得相當好。麻辣撈麵就比擔擔麵辣，麵身乾爽。醬料唔單麻辣，咸香味同酸味配合成非常惹味嘅醬料。我地加配左腩肉，同撈麵都非常配合。韮菜餅非常香脆，脆卜卜嘅炸皮包住大大份嘅韮菜豬肉。啖啖韮菜，非常過癮。鐘意食韮菜嘅朋友不妨試下。雙拼雲吞包括粟米豬肉同薑汁椰菜豬肉雲吞。雲吞大小適中，皮薄多汁。蔬菜豬肉嘅比例剛好。薑汁能夠帶出其他食材嘅鮮味，加埋香濃嘅麻辣湯底，非常推薦！海鹽青檸茶嘅鹽味比較出眾，但唔會太咸，非常清新。清新嘅檸茶中和口腔入面嘅麻辣味道。作為餐後飲品非常出色。