重慶劉一手火鍋店 (旺角商業大廈) (已結業)

早前得知劉一手係旺角開分店，就約左男朋友去食！之前我地係銅鑼灣食過一次覺得好正！旺角分店比較闊落，二人檯好似四人檯咁大，坐得好舒服，而且好多店員，服務好好！我地叫左半鍋豬骨湯同埋半鍋招牌麻辣湯係幾款牛之間周旋左一陣，都係簡左牛頸瘠，呢個部位真係好適合打邊爐，落湯拖一拖食得，油花分佈平均，入口即溶咁濟！冰震重慶鵝腸！同銅鑼灣一樣都係咁大碟呀！淥佢大約十秒就食～好爽口！沾埋麻辣湯食真係正到唔洗講野油炸鬼釀墨魚滑，店員推介可以就咁食，都可以放入湯煮，我輕輕點一點麻辣湯黎食，正！我地叫左兩份重慶小麵，上次食過覺得正過烏冬，因為同個麻辣湯好夾，所以今次叫左兩份，一人一碗！冰震龍躉，份量好多下，而且厚切，要煮番一分鐘到先食，但煮完都唔會散開仲非常有口感！仲叫左水餃皇、芝士丸、凍豆腐、皇帝菜、金菇，皇帝菜係我地至愛，凍豆腐就係叫黎索辣湯食架～男朋友叫左劉一手手工啤，而我就飲左菠蘿雪山！埋單一人600幾蚊，對劉一手好有信心，會再食！