金裝燉奶佬餐廳 (嘉湖新北江) (已結業)

平時較少幫襯呢間餐廳，覺得食物多肉、偏油膩，啱中學生和中年男人多啲。不過今日就偏偏想食肉！睇menu見到“麻辣湯底”四個字，好耐冇食麻辣了，立即勾起當年去成都5日食咗5餐火鍋嘅任性日子。一於叫香煎雞扒湯米線加麻辣湯底。為咗應戰麻辣，將必點嘅熱奶茶轉為凍奶茶，可以降火。麻辣湯米線賣相好吸引，湯底火紅火辣，雞扒切得整齊，仲有有豆腐卜、酸菜等，好期待。第一啖當然係飲湯……等等，咪就係超市都買到嘅麻辣火鍋味道？立即扁嘴，但唸深一層，呢間乜都有得食嘅茶餐廳，又點會花幾個鐘時間去熬麻辣湯底？食落，麻辣湯米線味道其實都OK，有辣味，仲有淡淡甜味，不過就少咗啲麻味。雞扒肉質和味道還可以，但好似煮熟放咗好耐嘅感覺。今次食麻辣有兩個唔小心：**唔記得留番豆腐卜最後先食，豆腐卜吸收麻辣味道先絕。**錯點咗凍奶茶，食麻辣應該飲可樂先爽。