鳳凰樓海鮮火鍋酒家 (已結業)

其實我地周不時都HOTPOT仲好鍾意自助形式，小肥羊﹑德興都去得多，不過呢間就係近期必去。第一次黎係2008年2月14日，情人節度度都貴，唔想俾人鋸又唔知邊度吃，見雜誌個廣告价錢唔貴就揀呢度食喇，又幾好彩打黎仲有位。果日試咗個鴛鴦湯底，沙爹淡咗D清湯冇特別，但火窩料又幾新鮮啵﹔要讚一讚佢地服務態度真係好，樓面得三個著黑西裝及一個白衫既男人，四個人都快手快腳好合拍仲一叫即應又夠爽快，全場爆滿都唔會俾面色你睇又唔會趕客，至少食完唔會一肚氣。第二次去係3月15日，趁天氣仲涼涼地又黎食。今次得十枱客左右，坐得仲舒適D。今次嗌咗個台式麻辣花甲鍋湯底，湯底拎上枱已經好吸引，嘩…花甲有六隻仲係大大隻﹔火鍋料依然新鮮﹔記得要食醉雞翼好香酒味架(仲唔係度度有得食)﹑肥牛﹑海蝦﹑生蠔﹑潮州魚旦﹑魚腐﹑豬肚。我仲預定朋友4月26日再黎幫襯…yummy。68蚊位包竹蔗水﹑酸梅湯﹑汽水任飲(茶芥﹑湯底另計)。9:30PM後每位平10蚊。同區既海天都要100蚊一位，論食物﹑服務就真係差九條街嘞。