正 麻辣·茶·雲吞 (已結業)

上網睇到公司附近有間四川野，平時鍾意食麻辣野嘅我，見到四川野一定即刻走去試啦！去到門口，舖仔細細，啲裝修又唔錯啵。平時去食啲四川野，個環境都唔係咁理想嘅，今次呢間不論係坐位定係用具都比想像中乾淨。好入正題，一坐底睇餐牌，款式唔係話特別多（通常咁嘅情況都係貴精不貴多，質素一定有返咁上下）。咁我就叫左，涼拌青瓜、川味口水雞絲（涼拌）、香煎麻辣腸粉、韭菜豬肉雲吞（秘製麻辣味湯底）、一杯烏梅山渣洛神花茶。上菜都算快，唔洗等好耐。涼拌青瓜配豆瓣醬好惹味，配埋少少芝麻，好香口。川味口水雞絲，雞絲配上爽脆青瓜絲同埋咸香蝦米，食落口感都好豐富，青瓜爽脆之餘，仲有浸蝦米香味留在口裹面。香煎麻辣腸粉，呢個有驚喜，一個街頭小食，平時落開甜醬麻醬，今次配四川麻辣係個大膽創新嘅嘗試（驚喜推介）。韭菜豬肉雲吞，皮薄餡靚，有少少偏咸，重口味嘅人會比較喜歡。果杯野飲酸酸甜甜幾開胃呀。鍾意食麻辣野嘅朋友都可以黎試下啦。