麻辣仙宮 (已結業)

附近又開左新餐廳，仲要係食辣野！岩哂我😛。叫做麻辣仙宮，裝修真係走宮廷風，幾貼切！老闆親自介紹呢到既菜色，雞煲同烤魚都比較多人叫。 點左份微辣既泡椒味烤魚，魚揀左桂花魚，骨唔算超多，肉都幾多！微辣唔算好辣，老闆好好人咁添左佢地自己剁既辣椒醬，落完即刻升級哂，勁惹味，配寛粉一流！烤魚可以順便打埋邊爐，所以另外點左份手切雪花肥牛。絕對唔係出面任食肥牛個d質素，而家唔係大半塊都係白色脂肪，個人認為呢個價錢既話算高質！蜂蜜百白果茶，甜度適中，可以解辣！紅糖糍粑溫馨提示 - 食完野先好叫，我太聰明咁同烤魚一齊落單，第一碟上菜既就係呢碟..熱辣辣炸出黎又一定要即食先好食，好脆好煙韌！呢到十二點先收，下次可以黎食個干鍋配啤酒當宵夜😝。