Darci by Aldou (已結業)

自己去開唔同嘅地方搵食，有時都覺得元朗係比較多隱世嘅小店。今日又同女朋友去雞地度發掘一下新嘅餐廳，點知俾我哋發現咗一個西餐廳都幾清幽，連牆上面都有特別設計嘅，好有心思。今次第一樣要介紹都係手工啤酒，就係之前我都飲過嘅少爺啤酒，不過今次係鹹檸七味，即係叫鹹檸啤啦。呢隻啤酒真係玩味十足。佢有好香濃嘅鹹檸味，撞埋去啤酒之後就變咗隻酸嘅啤酒。個人覺得呢隻酒係攞嚟打卡用嘅，飲落我就覺得麻麻地，可能個人口味問題啦，我就唔太鍾意酸嘅啤酒，不過久唔久飲一支又得意嘅。西冷牛扒。今次呢塊牛扒就比我想像中略細，不過佢又幾好肉汁嘅，味道算係唔錯，仲有少少芥末醬畀你調下味。畫龍點睛嘅係佢個薯菜，薯仔焗過嚟嘅，外皮鬆脆，同時佢又有啲芝士醬喺個薯仔上面，非常好食，有種妹仔大過主人婆嘅感覺。香草寶雲酥羊西冷。我之前以為係有支骨嗰隻羊扒，點知同我想像中嘅唔同，不過食落羊嘅騷味都幾突出，加埋羊扒外層鬆脆，係幾好食嘅。不過佢嘅配菜好特別，有嚿黃色嘅類似蛋嘅物體，我食曬成個餐都仲未估到係乜嚟嘅。藍莓梳打。成杯賣相好特別，啱曬啲女仔用嚟打卡，味道就係藍莓溝薄荷味，都唔錯嘅。呢間小店的確係唔錯，之後有機會再過嚟幫襯。