正冬火鍋料理 (已結業)

3個人晚上9點10走入舖頭，一坐低，個部長係咁問你飲乜嘢？食乜嘢？大佬呀，個八月十五都未坐暖，餐牌又未睇，而且我地仲有個人都未黎，你就係咁問喇......一輪機關熗咁...........我地話等陣先......佢唔夠3分鐘，又行返埋黎encore，真係火都黎，後尾我地睇到原來佢10點鐘青島做特價，咁我地梗係坐到10點先叫啦﹗原來唔止，除左啤酒特價之外，食物都係......妖，點做生意架？差幾分鐘都要搵人笨，係咪想冇第二次生意做？講返d食物，我地真係等到10點先叫，叫左個鴛鴦湯底，正到無倫；鴛鴦係麻辣同奶湯，兩者有好大分別，但真係好正﹗其餘食物都係大路嘢，叫左魚蛋，牛柳粒，手切肥牛，蝦滑，墨魚滑，菜，魚皮……我極力推介嘅係牛柳粒同魚蛋，其實我本身對牛都係麻麻，但d牛柳粒食得出係唔差的來貸，相反個手切肥牛就唔係好掂了﹗d魚蛋又好有魚味，唔泡唔鬆，我都食左兩碟﹗其餘蝦滑食得出係好新鮮，都推介﹗基本上我打邊爐係好低能，食黎食去都係個d，呢度已經食齊晒我鐘意d食物了﹗好滿足﹗最後，唔知係咪因為我地冇聽阿部長吩咐叫個d 10蚊隻的蠔，到12點佢叫我地換過張細枱，咁其實即叫我地走啦……咁都得？