篤篤車 (已搬遷) 新店位置

難得入到元朗，咁多好嘢食，都唔知揀邊樣好。胃就得一個，但真係好多人想試。之前睇過新假期，介紹過呢間車仔麵，最特別嘅係佢嘅湯底用咗泰式風味，有冬陰公湯底俾你揀，啱晒我呢個鍾意食辣嘅人！不過比我見到另一個好似更加吸引嘅湯底，就係鱷魚湯。本身我都驚會唔會真係有一舊鱷魚肉🐊之前上網睇過有啲圖，唔知邊個國家嘅人真係會食鱷魚，但我真係唔太想見到舊肉哈哈！原來呢個湯底味道有少少似魚湯，飲落好清甜，仲有少少奶香味，好特別，冇喺其他地方試過呢一隻味道。我叫咗我最鍾意食嘅雞翼、蘿蔔同豬大腸，豬大腸好彈牙，都有滷水嘅香味，雞翼都好入味，而蘿蔔就硬左少少，不過夾埋個湯一齊食，真係好滋味。不枉我咁遠走入嚟元朗，食到好嘢心情即刻靚晒！