木船泰國粉麵專門店 (已結業)

今次同朋友去左食位於太和嘅木船餐廳，餐廳座位闊落，坐得舒服。晚市叫左個套餐，滑蛋鰻魚飯，套餐連埋湯，我就揀左冬陰公湯。呢個套餐仲連埋三色小食，分別係魚餅，蛋，以及中華沙律。先講下個湯，佢地嘅冬陰功湯睇落紅卜卜，但都唔會只得辣味，成碗湯見到有好多菇類同香草，所以個湯剩係聞落都已經好香，味道好，值得推薦。而三色小食，三種嘅味道都不錯，食完d鹹鹹地嘅野可以中和下。 主角滑蛋鰻魚飯性價比幾高，飯粒分明，好咬。而滑蛋煮得剛剛好，仲有唔少蛋汁，好有蛋香味。鰻魚都幾大件，鰻魚汁鹹鹹甜甜啱哂餸飯，鰻魚肉質都不錯，唔會偏硬或者太諗。而飲品原本打算叫椰青，可惜當日店員話已經冇哂。所以就轉左叫泰式奶茶，泰式奶茶味道偏甜，茶味較淡，適合喜歡甜飲嘅人。整體晚市套餐性價比唔錯，地方企理衛生，下次可以再試其他菜式！