JK Brother’s (已結業)

今晚約左朋友去佐敦食呢間我經過好多次既火鍋放題。位置就係地鐵站D出口行兩分鐘左右。店舖面積都大，目測可以容納70人。呢度有幾款湯底揀，我地揀左人參雞湯底。揀左最平既$268/位。星期五要+$10，要加一。兩位起就送大大隻帶子。四位起就送海膽或者魚。牛肉係任食架。本身配既舊雞肉同蔬菜。雞味唔算重味，反而人參味就好重。我地想食到多啲雞，就係餐牌叫左醉雞。呢個醉雞真係好入味，夠曬酒味我鍾意！而且係大大塊既雞髀肉，嫩滑無比。呢度都好多火鍋配料架。最厲害係有活海鮮可以夾，有游水生蝦可以撈，又有好多款貝殼類。生蝦係生猛到係火鍋度跳番出黎。咁新鮮當然肉質夠曬鮮嫩彈牙！呢度都有啲熟食，例如炸蠔、雞軟骨串等等。飲品種類多，最特別係呢個烏龍茶味既酒！無落額外糖，卡路里完全來自酒精。甜品方面有我大愛既movenpick咖啡味雪糕，咖啡味夠曬重，中間仲有啲脆粒，不得了！呢度仲有啲蛋糕同布丁，幾欣賞金沙朱古力蛋糕同芝士蛋糕。而且份量全部都係細細粒，最適合每樣試啲。