樂天皇朝 (將軍澳中心)

营业中

休息中

朋友約食飯，話佢樓下新開咗間京滬菜都幾正，去到先知原來係樂天皇朝，之前係銅鑼灣行街見到都想試，只係唔得閒，今次終於有機會食，正呀！嚟到就緊係要食小籠包，叫左個蟹粉小籠包，入面真係都幾多蟹粉，食到好多蟹膏喺入面，不過間中都會有少少碎骨， 應該真係人手拆出嚟嘅蟹粉， 非常有心機， 不過如果連呢少少瑕疵都冇埋，咁就perfect喇。撈拌海中寶，其實的係香醋拌海蜇同蝦仁，酸酸甜甜嘅香醋加埋蒜蓉同辣椒，原來同海蜇咁夾， 有別於一般傳統食燒味會食到嗰種海蜇， 口感更加清新。蒜香骨， 同出面一般用嘅排骨唔同，呢度就用咗豬扒骨， 食落啖啖都係肉，蒜頭炸得好香，肉又好入味，好香蒜味。松子桂魚， 成條魚都炸得好香脆，每件嘅魚都鎅左花，炸完就變到好似一朵朵嘅菊花咁，撈埋酸酸甜甜嘅咕嚕汁，食落都仲保持香脆，一啲都唔會淋，加埋脆卜卜嘅松子， 忍唔住食多幾件。今餐食咗咁多嘢真係好飽， 見到原來都有啲特色嘢飲，例如呢個檸檬薏米水，味道都唔錯，好清爽解膩，食飯飲都幾夾，唔使下下飲茶。我都食得幾飽，而且每樣餸都好精緻， 值得再食。