家賀屋刺身寿司專門店

喺灣仔食晚飯實在太多選擇，有時真係唔知揀邊間好。是夜人剛在莊士敦道，諗起一轉入灣仔道就有家賀屋，橫掂好耐都冇食過刺身壽司，就同友人行上一樓晚饍。平日夜晚都差不多全滿，只有一兩張空枱。坐低後見有特價十二蚊一件壽司，亦有其他不同價位壽司選擇，今晚就專攻壽司。特價壽司叫咗赤貝、特大赤海蝦、油甘魚同三文魚腩。赤貝切得很大塊，有一點厚度，入口新鮮爽甜。特大赤海蝦肉厚，鮮甜中帶綿滑。油甘魚厚切肉質鮮甜，口感柔軟細滑，入口甘香，油份豐滿，食完令人回味。三文魚腩略瘦，與一般三文魚差不多。試完特價壽司，又試試餐廳廳主打的吞拿魚。特選鮪盛一客六件，有吞拿魚、中吞拿魚同大吞拿魚各兩件，220蚊唔算好貴。先由淡味食起，吞拿魚大致上都厚切，赤身可以嚐到吞拿魚的清鮮甜味，油脂較多的中拖羅同大拖羅則嫩滑入口即溶，充滿油香。青龍外形活像一條青龍，壽司卷著炸蝦，外邊再用點點綠色同三文魚籽點綴，入口帶點沙律醬的酸甜味。餐廳芥辣似鮮磨，成顆粒狀唔會好辣，豉油亦設有丼飯專用唔會好鹹。