段純貞牛肉麵XChatime (The Johnston) (已結業)

今晚喺灣仔嘅段純貞食咗晚餐，感覺真係好滿足！🍜我哋試咗佢哋嘅招牌紅燒腱心牛肉麵，湯底帶有濃郁嘅藥材香味，牛肉夠晒腍又入味，啖啖都係濃郁嘅牛肉味，好滿足。仲有嗰碗濃湯燉雞麵，入面一整隻雞髀，肉質嫩滑，雞湯香濃到我哋一啖唔剩，真係停唔到口！段純貞嘅手工面條同樣令人驚喜，彈牙咁啱啱好，啱晒我哋口味。

🥢另外，藥膳雞翼非常入味，雞翼浸滿咗花雕酒同藥膳嘅香氣，好過癮。三星蔥肉鍋餅煎得好香脆，食落去有層次感，放耐啲食皮又變得煙靭，咁樣食法我哋都好鐘意！🫓

我哋仲夾咗個蒜醬油麥菜，清清地，幫手平衡咗全餐嘅味道。甜品方面，芋圓超正！入面有好多配料，好似仙草同蒟蒻粒，每一啖都甜甜地又有嚼勁。🍧最後梗係試吓台灣手搖飲品，我哋揀咗手打鮮檸鳳梨茉莉綠茶，茶味清新，帶有鳳梨嘅香甜，完美收工！🍹