意想屋 (已結業)

上回去舊屋邨商場食 45 元吉列豬扒定食，物有所值，今次移師葵涌石蔭邨附近街坊小店，驚見 42 元自家製香脆煙肉牛肉漢堡包（可配薯條或沙律），仲包餐飲及餐湯，即試！實物上枱，靚仔噃。菜夠青翠飽滿；包身加工烘底，入口脆軟，讚。餡料有番茄、菜、大大塊煙肉，及被芝士圍封的勁厚手打漢堡扒，豐富喔。切開少少漢堡扒試食，味淡但肉味濃郁，與其他材料同食，反以覺得成個包的鹹度剛剛好。全靠煙肉幫手君加鹹，兩款肉一淡一鹹，超夾。煙肉無煎過火變肉乾，亦非常見的鹹爆貨式。食得出的心思、誠意兼好味，現價絕對低水。