樸一拉麵

营业中

休息中

今日去旺角，咁啱想食拉麵，就上openrice 睇下有咩好介紹，見「樸一」有咁多好評，就嚟試下。下午一點鬆啲去到，已經要等位。職員都好珍惜大家時間，等候其間已經派定order紙揀定想食咩。食拉麵我最中意有得揀！樸一唔單止口味有幾款你揀（大約有四、五款。因為而家冬天，我就揀咗辛辣），佢連湯嘅濃度，叉燒嘅種類（慢煮定炙燒 - 職員話炙燒塊肉會肥啲，咁中意食肥嘅我就梗係揀炙燒喇），配菜，葱，麵嘅硬度（可惜無超軟），甚至連麵嘅種類（博多白麵定東京黃麵）都有得你揀，真係好鬼過癮。除咗拉麵，我仲叫咗一客炸蠔同蘿蔔。好，唔講拉麵，講啲小食先。炸蠔一碟有三小塊，炸得熱辣辣，幾好食。碟蘿蔔就有四塊左右，一擺入口咬一啖，蘿蔔不單止入味，仲軟淋淋，好鬼正。小食都咁好味，碗麵就唔駛講。第一，碗麵夠哂熱（唔熱唔香唔好食）；第二，嗰辛辣湯好好味，唔太咸唔太辣，味道啱啱好；第三，麵身雖然唔夠軟（個人喜好我中意超軟，係豚王就有得揀），不過唔大問題。最後，塊叉燒，三個字，無得頂！厚身，肥瘦適中（其實偏肥），燒得好鬼香。總括嚟講，高質素，一定會返食。慣例，食嘢就食嘢，唔中意影相。