Lagom Kaffe (已結業)

觀塘出晒名多上樓餐廳，今日去開觀塘，上網一搵，呢間好多人推介，就帶埋小朋友去試一試，好彩，小朋友都滿意😅一入到餐廳，非常寬敞，枱與枱之間不擠迫。出邊仲有個小花園，非常光猛，透出自然光，感覺好舒服。手機落單，真係要快手，本來我小朋友揀咗全日早餐，睇多一陣，竟然售罄…..要再揀過。我哋叫咗香煎帶子黑松露雜菌意粉，凍芒果汁，歌劇院蛋糕，栗子蛋糕。黑松露意粉一到，超香黑松露味。上面仲有好多芝士粉，係我小朋友favourite😍. 意粉好彈牙，個汁勁creamy，廚師有啲料到。我叫咗杯凍芒果汁，就係普通芒果汁，下次一定要試吓佢嘅咖啡，有好多不同嘅咖啡可以選擇，仲有好多拉花，不過呢兩日有啲唔舒服，怕飲咖啡瞓唔着，所以今日忍口。好彩有叫蛋糕😄，歌劇院蛋糕好正，最頂有好香濃嘅朱古力，中間蛋糕有少少碎果仁，仲有粒士多啤梨，感覺好清新。栗子蛋糕都好食，栗子味好香，仲有藍莓同士多啤梨。 我鍾意歌劇院蛋糕多啲，會再encore😃。下次要撇低阿女，同朋友嚟呢度再食，飲番杯咖啡先☕️。