德美壽司 (新都城中心1期) (已結業)

限聚令之後我哋都好少出街食飯，多數都係嗌外賣，好彩係屋企附近有間高質素嘅日本餐廳，雖然唔算街坊價錢，但質素可以媲美銅鑼灣同尖沙咀嘅日本餐廳，我又鍾意連小朋友都好鍾意食佢。高價食品但用平啲嘅價錢就可以食到，lunch更加幾十蚊就有一個餐。除咗有主菜仲有沙律同埋燉蛋添。沙律菜好新鮮，食入口好爽口，佢仲有半粒帶子刺身，配埋沙律醬一齊食，酸酸甜甜好開胃。我今次就叫咗雜錦壽司，再加一碗牛肉烏冬，都係$99外賣仲有九折添。壽司好新鮮，睇吓隻蝦大隻過我隻手指，就知道真係真材實料，帶子肥美，食落口好鮮甜，吞拿魚茸份量好多，配埋香蔥增加口感，入口軟滑，好好味。雖然佢話係迷你烏冬，但係食落其實都好多好大碗，烏冬好滑索晒啲湯汁，小朋友都話好好味，一個午餐有咁多嘢食，真係飽到我晚餐都唔係幾食得落，所以我喺呢度食lunch真係好抵食，外賣就更加之抵。