醉胡爐 (已搬遷) 新店位置

天氣稍涼，最啱就打邊爐。今日約左個客係尖沙咀傾野，收工就同friend試下位於柯士甸路嘅醉胡爐。餐廳裝修精美別緻，座位闊落。餐廳有多款火鍋配料可供選擇，用料上盛，款式特別。除左火鍋配料，仲有幾款特式小食(麻、辣、椒鹽香脆樣樣齊，佐酒一流。今晚我地叫左個「招牌鮮椰青雞鍋」。一上枱，侍應即場係我哋面前加酒，將雞件略炒，再加成個椰青。加酒時火勢都幾猛烈，不過就香味四溢。水滾後，我地先試飲個湯底，味道清新鮮甜，雞件肉質嫩滑，份量十足。我地仲叫左手工雲吞、黃金墨丸、脆肉鯇魚腩、生蠔、同埋幾款時蔬。☆ 雲吞皮薄餡靚，蝦肉大大隻☆黃金墨丸內有蛋黃，一咬落去彈牙爆汁☆脆鯇魚腩，肉質結實爽脆☆桶蠔勁大隻，足足大半隻手掌咁大隻，煮完都無縮水，非常新鮮☆壓軸出場「飛驒和牛」，雪花分佈均勻，灼幾下就食得，入口鬆軟滿有油香。雖然我地叫左細碟，但都幾大份，兩個女仔一齊食，剛剛好。餐廳的食材、環境、服務質數都非常出色，值得推薦。