漁一海鮮火鍋料理 (已搬遷) 新店位置

朋友知道尖沙嘴有開新嘅邊爐店，有醉雞湯底食，仲有新開張優惠，就搵咗我去一齊試下新嘢。我哋嗌咗半隻雞嘅醉雞鍋，雞件係另上嘅，雞肉嫩滑有雞味，有少少肥肉，雞皮好香。之後仲有碟手切肥牛，肥瘦適中，口感軟稔，牛味濃，而且好大碟。手唧墨魚麵唔多地方有得食，佢個魚麵好出色，淥耐咗都爽口彈牙，鮮味十足。手製韭菜餃都誠意十足，皮薄餡料飽滿，韭菜香而且菜多肉少，唔會太結實仲有好多汁。唐生菜新鮮，浸滿醉雞湯，有種上湯生菜嘅感覺。紫貝天葵清熱解渴，唔會太甜，有少少酸瞇瞇。除咗火鍋之外，我哋仲嗌咗魚生拼盤。有帶子、八爪魚、三文魚、海膽同甜蝦，刺身整體都新鮮，海膽仲有得配紫菜食。甜蝦甘甜，三文魚肥美，仲清一清火鍋嘅熱氣。