今次同朋友專登嚟試點心，果然無失望～
西班牙黑毛豬叉燒包鬆軟香甜，黑毛豬肉汁豐富；鮑魚燒賣皇上面嘅鮑魚入味彈牙，店員見有粒鮑魚跌咗喺一邊，擺盤唔夠靚，竟然主動拎返去調整再送上，非常認真！翡翠筍蝦餃皇蝦肉鮮爽，筍粒增添口感；和風鰻魚餃同松露野菌餃都好有特色，fusion得嚟唔會搶味。
稍微失色嘅係紅米脆網蝦腸，脆網略嫌油膩，如果可以瀝油做好啲就更理想。不過沙茶醬金錢肚同竹炭豆腐都好夠水準，值得一試。
主菜推薦鮑汁花膠撈飯！份量十足，足夠3-4人 share，鮑汁濃郁而不膩，係必點之選～招牌阿拉斯加長腳蟹留待下次人多再試，見到隔離枱食緊真係好吸引！
整體而言，食物質素高、環境舒適，服務更加分，唯一係部分菜式偏鹹，如果味道可以清淡少許就更完美。適合一家人聚餐或請客，會再encore！
