影片
更多
2017-12-10
62 浏览
出席完兒子嘅學位頒受典禮後，一家人就去吃晚飯慶祝。選了堅拿道西冠景樓嘅「來一鍋」，因早前瀏覽 facebook，得知餐廳做緊新張優惠，客人於星期一至日晚市任何時段光顧，皆可享75折，所以就一早訂咗檯，同兩隻小鬼來吃任食火鍋。店子位於 2 樓 A 號舖，由地下拾級而上，門外設有梳化位讓客人等候，而門口就擺放了一棵聖誕樹，加上沿路的聖誕裝飾，充滿節日氣氛。踏進內，地方頗闊落，驟眼看裝潢似 Café，白色餐桌配天藍色座椅，牆上花架綴有小盆栽，再以純白單車形吊燈作襯托，令人感覺清新舒適。拿起桌上嘅 A3 餐牌，「海鮮火鍋套餐」晚市由 5:30pm 開始供應，以入座時間計算，可以任食 2 個半鐘，價錢每位 $368，另外每人要收醬料 $10。至於項目就包括有兩款任食前菜、鍋底、每兩個人一碟肉類、以位上嘅主菜，包海鮮盛合、即炸響鈴、即炸魚皮、手工火鍋拼盤等，另外還有任食配菜、火鍋配料、任飲果汁、汽水及每晚精選甜品。揀好鍋底後，可以先自行混醬。店裡的醬油，花款唔多，只有麻醬、蔥花、炸蒜、紅椒、芫茜和生蒜，客人可因應個人喜好，自由配搭，悉隨尊便。馬上開餐，前菜有四川麻辣木耳同手拍青瓜，兩款都可以無限
出席完兒子嘅學位頒受典禮後，一家人就去吃晚飯慶祝。選了堅拿道西冠景樓嘅「來一鍋」，因早前瀏覽 facebook，得知餐廳做緊新張優惠，客人於星期一至日晚市任何時段光顧，皆可享75折，所以就一早訂咗檯，同兩隻小鬼來吃任食火鍋。
店子位於 2 樓 A 號舖，由地下拾級而上，門外設有梳化位讓客人等候，而門口就擺放了一棵聖誕樹，加上沿路的聖誕裝飾，充滿節日氣氛。踏進內，地方頗闊落，驟眼看裝潢似 Café，白色餐桌配天藍色座椅，牆上花架綴有小盆栽，再以純白單車形吊燈作襯托，令人感覺清新舒適。
拿起桌上嘅 A3 餐牌，「海鮮火鍋套餐」晚市由 5:30pm 開始供應，以入座時間計算，可以任食 2 個半鐘，價錢每位 $368，另外每人要收醬料 $10。至於項目就包括有兩款任食前菜、鍋底、每兩個人一碟肉類、以位上嘅主菜，包海鮮盛合、即炸響鈴、即炸魚皮、手工火鍋拼盤等，另外還有任食配菜、火鍋配料、任飲果汁、汽水及每晚精選甜品。
揀好鍋底後，可以先自行混醬。店裡的醬油，花款唔多，只有麻醬、蔥花、炸蒜、紅椒、芫茜和生蒜，客人可因應個人喜好，自由配搭，悉隨尊便。
馬上開餐，前菜有四川麻辣木耳同手拍青瓜，兩款都可以無限追加。而個人就較喜愛麻辣木耳，既香辣又清爽，非常開胃，不過由於要留肚吃主菜，故淺嘗即止。
鍋底方面，共有 10 款選擇，2-4人可選一款，6-8 人送兩個，而 9 位以上就送三個鍋底。揀了花膠螺頭雞鍋 (濃湯)，待湯鍋滾後，先嘗一口湯底，香濃入味，清甜滋潤。再舀起花膠螺頭，前者爽彈厚身、而後者就有咬口而不韌，配埋嫩滑嘅雞肉，溫潤暖胃。
火鍋料方面，先由肉食開始，肉類每兩位可選一碟，有西班牙黑豚肉、手切安格斯 Prime Grade 牛頸脊肥牛片，兩款可供選擇。由於有兩個牛魔在場，所以就揀曬牛頸脊，肥牛片油脂分佈好平均，肉色鮮紅，入口嫩滑重牛味，加上被湯汁洗禮過，吃起來特別惹味，超讚！
跟住就輪到吃主菜，海鮮盛合非常之大堆頭，包括有：有殼扇貝，有殻鮑魚，大蝦，有殼蠔、珍珠蚌、象拔蚌等。幾款之中，最愛吃就是鮮橙亮麗、肉質爽彈嘅大蝦，原來連蝦頭部份都帶些少膏，就算燙熱也忍不住往嘴裡送。另外鮑魚和扇貝亦屬必食之選，鮑魚爽口彈牙、扇貝滑嫩多汁，好味程度不單令人食指大動，還會「直豎拇指」。
炸物方面，有即炸響鈴、即炸魚皮，要特別推介即炸響鈴，非常之巨型，足足大過平日食嘅兩倍有多，而且由於是即叫即炸，所以上桌時仍新鮮熱辣，食落脆卜卜，真係無得輸。
手工火鍋拼盤共有 8 款火鍋料，包括手工豬肉釀鮮菇、手工墨魚釀豆卜、手工墨魚丸、手工豬肉丸、手工牛肉丸、手工雲吞、手工韭菜餃、手工水餃。手工雲吞質素不俗，雲吞隱隱透著內餡，色相佳，不易穿破，收口位不會因太多皺摺而死實，咬下柔滑，輕盈十足。韭菜餃脹卜卜，餃皮與餡料沒留多餘空隙，可嘗到韭菜香氣與豬肉鮮嫩多汁的口感，味道又香又濃。
任食配料方面，其實選擇都幾多，有成 46 款，不過由於已經好飽，所以只揀咗幾款蔬菜，有豆苗、油麥菜、菜心苗，要特別推介時令嘅豆苗，幼嫩滑潤，清香脆爽，多吃一點亦無妨。
甜品一人一客，係筆者至愛嘅心太軟，成品雖然有點迷你，而且切下去時，裡面溫熱的朱古力漿亦沒如火山熔岩般流出，但蛋糕入口軟熟濕潤，食落香濃軟滑，而且不會死甜，為這晚畫上完滿句號。
臨走時見門外餐牌貼上晚市 85 折，原來據店員稱 75 折優惠當晚是最後一天，不過之後仍會有 85 折優惠，如果大家想食，就唔好錯過喇！
张贴
