海南少爺 (已結業)

已經有段時間冇食星加坡或者馬來西亞美食，今次去尖沙咀海運大廈行街，見到有間食星馬菜嘅餐廳叫海南少爺有好多人入去食，所以我都試下。今次點咗蔥油薄餅配咖喱汁、馬拉盞通菜、椰香海鮮喇沙及招牌海南雞飯配肉骨茶。蔥油薄餅夠香脆而且熱炙炙，配咖喱汁食好有南洋風味，淨食蔥花味就比較出。馬拉盞通菜好夠份量，通菜又新鮮，配撘秘製惹味馬拉盞食係星馬菜必叫之選。椰香海鮮喇沙椰子味濃而且唔係太辣，有大蝦、豆卜、流心蛋、魚片、魷魚、芽菜等新鮮配料，十分豐富，麵底有米粉及米線，配合喇沙湯底食冇得輸。海南雞飯果然係招牌菜，雞肉嫩滑兼唔肥，因為餐廳嚴選百日三黃雞烹煮，肉骨茶有16種上等中藥食材慢火煲製而成，極美味回甘，大家一定要試。