東京大眾酒場 (已結業)

唔知大家有無試過同另一半食壽司或刺身拼盤，而每款都係得一件，你哋又會點分同點揀呢？今日我同M佬去咗尖沙咀食東京大眾酒場，叫咗壽司盛合(9件)，9款都夠晒新鮮，望見件件都想食，而每次M佬都會讓我揀先，有時都覺得佢太過就我，我就嚟成為港女㗎喇，所以今次我決定讓佢一次。雞湯一坐低就送上餐前雞湯，乳白色嘅湯色已經好吸引，飲落雞味香濃，再配上蔥花，好暖胃。關東煮揀左日本大根、日本魚餅同粟米，最鍾意清甜多汁嘅大根，又甜又無渣，入晒味超正！附上四種醬料：芥辣、甜味噌、水果味噌同辣味噌，不過，每款食品都入晒味，唔點醬都得。不過就略嫌湯少咗啲。壽司盛合9件話就話讓M佬揀先，但M佬話每次佢想揀我鍾意食嘅，我嘅眼神都會厲住佢，所以港女是這樣練成的！壽司有拖羅、帆立貝、三文魚、海膽、牡丹蝦等，件件都新鮮水潤，最鍾意係牡丹蝦，夠彈牙又膠口，蝦頭又多膏；另外帆立貝超厚身，好鮮甜！