麵屋常勝 (已結業)

觀塘嘅東廣場向來係高質小店嘅集中地，前排女朋友話好想食日本拉麵，就一於帶佢黎呢間我bookmark左好耐嘅拉麵小店「麵屋常勝」食！作為一間小店，呢度嘅座位真係唔多，所以都有機會需要等位。不過等候嘅時間可以玩餐廳提供嘅遊戲機！呢度嘅裝修好有東京啲拉麵店嘅感覺，迫得黎好有日本feel，我個人覺得係幾正嘅！餐廳食物選擇雖然唔算好多，但每一樣都好吸引。最後我同女朋友決定每人一碗拉麵再加少少小食。「吉列蝦濃蝦湯叉燒拉麵」：呢度嘅招牌菜，所以我同女朋友一人一碗。湯底標榜無味精，飲落去真係啖啖嘅鮮蝦味，而叉燒好大塊好juicy，吉列蝦熱辣辣好香脆！另外，我地加錢要嘅溏心蛋值得一讚，因為真係好好味，將碗拉麵昇華左！「炸魷魚」：賣相好吸引，同樣係炸得熱辣辣。魷魚本身好爽口，而且調味唔會太鹹，出色！「南蠻炸雞」：好大份好多舊，南蠻醬好濃好邪惡，炸雞肉質唔會太乾，係好唔錯嘅小食！「日本汽水」：兩款汽水都係日本進口，口味絕對係正嘅。飲日本汽水令成餐飯更加有喺日本食嘅感覺，哈哈！