鮨和居食屋 (已結業)

成兩年無返過家鄉啦，老公為咗一解我思鄉愁，特登帶我去一間靚靚日本餐廳嘆魚生。 餐廳好寧靜好舒服，可以靜靜哋傾下偈。 刺身樣樣都想食，最後揀咗個廚師發辦唔使煩惱，廚師發辦刺身拼盤有白拖羅，鰈魚，吞拿魚腩，牡丹蝦，油甘魚，法國聖馬田生蠔，全部都好新鮮，尤其拖羅油脂感重，非常好味。 生蠔新鮮肥美。燒榮螺用透明碗盛載，個底用咗藍海鹽，榮螺入面有上湯，冬菇粒，芫茜，味道鮮甜。 油甘魚頭煮係店員大力推介，我自己從未試過呢個菜式，不過出奇地好味，魚頭充滿醬油、味醂嘅甜味，油甘魚頭油脂感足夠，蘿蔔吸收晒所有精華，非常鮮甜入味。 特上三色丼賣相吸引，未食之前眼睛已經食飽先，有鮑魚、吞拿魚籽、碎香葱吞拿魚，有三種唔同嘅層次，米飯係用日本珍珠米，粒粒都飽滿有光澤，口感軟糯，米香十足。