素年 (汝州街)

营业中

休息中

早排睇電視介紹素年嘅芫茜 Risotto，真係齋睇畫面都流哂口水🤤，早排去咗佢喺汝州街新開嘅分店，點知坐低睇 menu 先發現冇呢款名物叫，勁失落😭。唯有極力抑壓 “除卻巫山” 嘅心情，叫咗個冬蔭意大利粉，估唔到都有驚喜：意粉嘅冬陰功味較真實嘅辣味稍減，但香味如一，配埋泰茄子，草菇，番茄同蘆筍等食材一齊食，雖然欠缺我最喜愛嘅肉類，但口感依然豐富，調味亦恰到好處，好食👍，如果麵身再硬少少就更加正。食食下，見旁邊幾乎枱枱都叫沙茶醬燒粟米，即刻搞到我心思思，不過一個人肯定食唔哂，唯有下次 call 齊馬嚟再叫。除咗食物質素，呢度嘅服務亦值得一讚：店員數量多，招呼頗周到，個個殷勤有禮，顯得訓練有素。另外，餐廳嘅裝修簡約，乾淨，令人感覺舒服，其中一面牆放置咗一啲寄賣物品，除咗書籍，小型電器，陶瓷杯外，仲有悅和醬園嘅豉油，醋同辣椒醬，以後想買就唔使山長水遠走入荃灣啦🤗。